هامان

هو صحيح فرعون غرق
ومعاه هامان
لو كان صحيح
طب احنا ليه
لسه ف ميدان
وعصايتي فين قدام عصاهم
لا اتحكم
ان العصايا
تبقى افعى
للى عصاهم
ويوم الزينة بقى ذكرى
دم الشهيد بقى نكرة
والثورة يوسف
جوه بير
باعوه رخيص
زى الأجير
وسنين عجاف والله جاية
لو بعنا زى ما باع يهوذا
لو كنتوا ناس
من قوم لوط
او حتى عابدين لبوذا
مكنش هان
سحل الفتاه
ولا كان بسيط
دمع العجوزة
انسوا تهل المعجزة
ولا مسيح ولا منتظر
تلاتين سنة بننتظر
آن الآوان
يرحل هامان
والمعجزة هتكون حقيقة
لو صرخنا م الميدان :
يرحل هامان
يرحل هامان