العمل الأول (قتل أسد نيميا):
أسد نيميا ده
أسد غير عادي
ضخم جدًا
جلده مش بيتأثر
لا بالحديد ولا بالحجر
يعني
لايمكن اختراق جلده
وبالتالي
لا يمكن إصابته
هيراكليس بدأ يصوب على الأسد سهم مسموم
لقاه مش بيأثر فيه
وبعد كدة حاول يضربه بسيفه
لكن السيف اتنى
من غير ما يصيب الأسد
وبرضه لما جه يضرب بالهراوة
الهراوة اتكسرت
ولما الأسد دخل عرينه
اللي له مدخلين
حط شبكة متينة
على مدخل منهم
ودخل له العرين من المدخل التاني
وهاجم الأسد
وصارعه
وانقض عليه
وقدر يقتله
غالبًا يا بالخنق
يا إما كسر فكه
وده غالب الظن
بعد كدة
هيراكليس سلخ جلد أسد نيميا
وأخد جلده كملبس ليه وشعار
العمل التاني (قتل الهيدرا):
الهيدرا دي كائن أفعواني
بجسم كلب ضخم
له رؤوس كتير
تشبه رؤوس الأفاعي
وكان فيه راس من رؤوسها
خالدة مش بتفارقها الحياة
أما باقي الرؤوس
فكان لها جذور
بتخليها كل ما تتقطع تنمو تاني
دم الهيدرا سام
وكانت بتنفث السم ده
على أي مهاجم
بدأ هيراكليس المعركة مع الهيدرا
بإنه يصوب سهامه
على جحر الهيدرا
بناء على نصيحة الإلهة أثينا
من كُتر هجوم هيراكليس بالسهام على جحر الهيدرا
خرجت له
وبدأ القتال
وكان هيراكليس
كل ما يضرب راس من رؤوسها بسيفه ويقطعها
يطلع بدالها راس جديد
وفي رواية تانية
إن كل راس بيقطعها
بيطلع بدالها تلاتة
وكان فيه سرطان بحري
بيساعد الهيدرا في المعركة
فكان يخرج من البحر
ويعض رجل هيراكليس
لكن هيراكليس قاومه وقتله
وهيرا كونها عدوة لهيراكليس
كافئت السرطان
وخلته برج سماوي
اللي هو برج السرطان
طيب نكمل المعركة
هيراكليس مسك شعلة نار
وكان كل ما يضرب راس من رؤوس الهيدرا
يكوي مكانها بالنار
فميخرجش بدالها راس جديدة
لحد ما وصل للراس الخالدة
وقدر يقطعها بصعوبة شديدة
لكن فضلت الراس حية
رغم إنه قطعها
فدفنها تحت الأرض في الأعماق
لكن ظل فحيحها مسموع
وخلع أحشاء الهيدرا
وغرس سيفه في دمها
فأصبح سيفه سام
العمل التالت (إحضار أيلة كيرونيا دون جرح):
والأيلة دي حيوان
يشبه كتير الغزلان
وطلب يوريسثيوس من هيراكليس
إنه يجيب له أيلة كيرونيا
حية درن جرح
وكانت الأيلة دي تحديدا
سريعة جدًا في الجري والقفز
وليها حوافر برونزية وقرون دهبية
هيراكليس طاردها
وعمل لها كماين
واحد ورا واحد
لحد ما الأيلة وصلت منهكة
لحد وادي لادون
وهناك راح لها هيراكليس
وشالها بهدوء ووداها للملك
العمل الرابع (إحضار خنزير إريمانثوس دون جرح):
ده كان خنزير متوحش
ويعتبر وحش
عايش بين الأحراش
وكان طلب الملك يوريسثيوس
إن هيراكليس يجيبه حي بدون ما يجرحه!
هيراكليس خرجه من مكمنه
بعد لما صرخ صرخة عالية جدًا
واستدرجه لمكان منخفض ونط فوقه
وكتفه بأغلال من حديد
ورجع للملك
وهو شايل خنزير إريمانثوس على كتافه
العمل الخامس (تنظيف حظاير أوجياس في يوم واحد):
الحظائر دي
كانت بتحوي
أعداد مهولة من القطعان
من أنواع مختلفة
كلهم عايشين على منطقة كبيرة جدًا
ومكنش حد يقدر ينضف المنطقة دي
علشان مساحتها الضخمة
وبالتالي اتحولت لمصدر للأمراض والأوبئة المميتة
وكان أوجياس واعد هيراكليس
إنه هيديله عُشر الماشية
لو قدر إنه ينضف الحظاير قبل حلول الليل!
هيراكليس حفر حفرتين كُبار
كل واحدة قصاد التانية
وراح على نهر ألفيوس ونهر بنيوس
وغيّر مجراهم ناحية الحظائر
فماية النهرين جرت لواحدة من الفتحتين
ولم الزبالة والفضلات المتراكمة من الفتحة التانية
وكل ده حصل قبل حلول الليل!
العمل السادس (قتل وتشتيت طيور ستيمفالوس):
ودي كانت طيور موقوفة على آريس إله الحرب
لها مخالب وأجنحة من البرونز
وكانت بتتغذى على لحوم البشر والحيوانات
فكانت بتخرج في مجموعات ضخمة
تهاجم سهل ستيمفالوس
وتقتل اللي تلاقيه من حيوانات أو بشر!
أثينا أدت لهيراكليس شُخشيخة
ليها صوت قوي جدًا
فلما هيراكليش هزّها
عملت صوت أقوى من صوت الرعد
خلت الطيور تترعب من الخوف
وتتشتت
فطارت بدون نظام
وهنا استغل هيراكليس الفرصة
واصطاد معظمهما بسهامه
وقليل منهم هربوا لأماكن مهجورة
العمل السابع (قتل الثور الكريتي):
كان التور ده بيعيش في جزيرة كريت
وكان تور جبار
بيقلع النبات ويفسد الأخضر واليابس
هيراكليس تابعه
لحد ما دخل معاه في معركة
وكان بدون سلاح وقدر يتغلب عليه ويقتله!
العمل الثامن (ترويض خيول ديوميدس):
كان ديوميديس ملك على تراقيا
وعنده أربع خيول متوحشة
وغير مروضة لدرجة إنها بتاكل لحم البشر!
هيراكليس طارد الخيول
بحذر شديد
لحد ما وصل بيها لشاطئ ما
وبدأ يعاملها معاملة خاصة
ويحاول ترويضها واستئناسها
وبالفعل قدر على ده
ورجع بيها على ميكيني!
العمل التاسع (إحضار نطاق هيبوليتي ملكة الأمازونات):
الأمازونات شعب من النساء المحاربات
وهو مجتمع أنثوي
لا يسمح بالاختلاط بالرجال
وبيكرهوهم جدًا
وبيحاربوهم
والأمازونات دول
ليهم مملكتهم الخاصة
اللي بتكون هيبوليتي ملكة عليهم
الكل بيطيعها
ومحدش بيقدر يعصي أمر ليها
وكانت هيبوليتي بتلبس حزام
حوالين وسطها
كان هدية من جدها آريس إله الحرب!
لما عرفت هيبوليتي
بقدوم هيراكليس
رحبت بيه في مملكتها
اعترافًا منها بقوته وشجاعته
اللي الكل بيشهد بيها
هيبوليتي أعجبت بهيراكليس
ورجع لها الشعور بأنوثتها
وحبت هيراكليس
وأهدته نطاقها كدليل على حبها ليه!
طبعًا هيرا مرضتش عن اللي حصل
واعتبرته نصر زايف
فتنكرت في زي واحدة من الأمازونات
وبدأت تروج لإشاعة مفاداها:
إن هيراكليس
دبر خطة لاختطاف هيبوليتي
وبالتبعية
ثارت الأمازونات لده
وقرروا الانتقام
بمنتهى الغضب
وراحوا علشان يهاجموا هيراكليس!
هيراكليس ظن إن هيبوليتي
هي اللي دبرت الهجوم ده
وإنها خدعته
هيراكليس خرج على الأمازونات
وقتل كل القادة
وقتل حتى هيبوليتي ملكة الأمازونات
واستولى على حزامها
وإداه للملك يوريسثيوس
العمل العاشر (إحضار قطيع جريون بدون ثمن):
الملك يوريسثيوس
أمر هيراكليس
إنه يجيب له قطيع جريون
دون استئذان صاحبه (يعني سرقة)!
الجريون ده مسخ شديد القوة
بيتفرع من وسطه 6 أجسام ب3 رؤوس و6 دراعات!
ده بالنسبة للجريون
طيب بالنسبة لقطيعه
فمكنش قطيع عادي
كان مين ييرعاه؟
كان بيرعاه يوريتيون بن آريس إله الحرب
ومعاه كلب حراسة
هو يوريثوس المسخ اللي عنده راسين!
هيراكليس نزل ع الكلب وقتله بضربه واحدة
ولما يوريتيون سمع نباح الكلب
خرج لهيراكليس
فقتله هيراكليس بضربة من هراوته
خرج لهيراكليس جريون بنفسه وهجم عليه
لكن هيراكليس قدر يقتله
بإنه صوّب ناحيته سهامه السامة
فوقع ميت
وقدر هيراكليس إنه يستولى ع القطيع
من غير استئذان
وبكدة يتم العمل العاشر.
العمل الحادي عشر (إحضار تفاحات الهسبريديس):
حديقة الهسيبريديس
اللي فيها التفاح الدهبي
والي بتملكها هيرا بنفسها
والحديقة دي مكنش حد يعرف مكانها
وكان اللي بيراعي الحديقة دي
وعايش فيها هم بنات العملاق أطلس
وكان المسخ لادون هو المكلف بحراسة الحديقة!
هيراكليس راح لنريوس عجوز البحر
علشان يعرف منه مكان الحديقة
واضطر إنه يدخل معاه ف معركة
لحد ما نريوس اعترف بمكان الحديقة
وده يعتبر كشف لسر إلهي
وبمجرد انتصار هيراكليس ومعرفته السر
راح بمنتهى السرعة للجانب التاني من العالم
اللي فيه مكان الحديقة
ودخل في معركة حامية مع المسخ لادون
وانتصر بصعوبة!
وبعدين وهو رايح يجيب التفاحات
قابل العملاق أطلس
وده دوره إنه يشيل قبة السما على كتافه
لما أطلس شاف هيراكليس
لقى إن دي فرصة
إنه يستريح شوية من الشقاء اللي هو فيه
فطلب منه إنه يشيل بداله قبة السما شوية
وهو يروح يجيب له 3 تفاحات
ويحقق طلب يورسثيوس
هيراكليس وافق
وفعلًا شال بداله قبة السما
لكن لما أطلس حس بطعم الحرية
رفض إنه يرجع وياخد حمل القبة على كتافه
هيراكليس استخدم الحيلة
ومثّل إنه موافق وخاضع لأمر العملاق أطلس
بس استأذنه إنه يروح يجيب مخدة
يسند عليها كتفه علشان التقل الي هو شايله
وأول ما أطلس رجع وشال تاني قبة السما
هيراكليس خلع
وراح جاب التفاحات
وشكر أطلس على مساعدته
وبكدة يكون حقق الطلب ال 11
للملك يوريسثيوس
العمل الثاني عشر والأخير (إحضار الكلب كيربيروس):
الكلب كيربيروس
هو حارس بوابة العالم السفلي (عالم الموتى) تارتاروس
وكيربيروس كلب له 3 رؤوس
مش بيسيب مكانه أبدًا
طبقًا لأوامر هاديس إله العالم السفلي!
وعلشان هيراكليس ينفذ الطلب ده
كان لازم يعدي للعالم الأخر
اللي طبعًا اللي بيروحه مينفعش يرجع منه
وكان عليه إنه يعدي نهر ستيكس
اللي مكنش حد بيعديه إلا الموتى
لكن المراكبي خارون
المسئول عن نقل الموتى في القارب بتاعه
لمّا شاف هيراكليس
اتفزع من قوته وعبر بيه ف القارب!
وفعلًا هيراكليس عدّى ووصل لعالم الموتى
وهناك رحب بيه هاديس إله العالم الآخر
هو ومراته برسيفوني
فشرح له هيراكليس المهمة اللي هو جي علشانها
فهاديس تظاهر إنه موافق
لكن بشرط
إن هيراكليس يخضع الكلب ليه
بشرط إنه ميستخدمش لا الهراوة ولا السهام!
وفعلًا هيراكليس وافق
وقابل الكلب وانقض عليه
وخلّى الكلب كيربيروس يستسلم له
وأخده ورجع بيه للملك يوريسثيوس!
وبكدة يكون هيراكليس
أتم المهمات ال12 المكلف بيها
علشان يكفر عن إثمه
وبعد كدة هيراكليس أصبح إله
وصعد لجبل الأوليمبوس
واستقبلته أثينا هي وباقي الأرباب ورحبوا بيه
الكلام عن هيراكليس خلص
لكن لسه فيه كلام كتير
عن باقي الآلهة وباقي الأساطير
